АЛҒАШҚЫ ҚОҢЫРАУ СОҒЫЛДЫ
Бүгін 1-ші қыркүйек «А. Пушкин атындағы N3 жалпы білім беретін мектебі» білім нәрімен сусындайтын шәкірттеріне өз есігін айқара ашты. Алғашқы қоңырау салтанатты жиынына Мақтаарал ауданы білім бөлімінің бас маманы Қошқаров Асанхан мырза, Мақтаарал ауданы, Мырзакент кенті әкімінің орынбасары Абдиров Жарқынбек мырза және мектебіміздің директоры Оракбаева Гулмира Ортаевна сөз алып, оқушыларды жаңа оқу жылымен құттықтады. Сонымен қатар мектебіміздің ардагер ұстазы Лукина Вера Георгиевна қатысып, ізгі тілектерін жеткізді. Таудай талабы бар, тарыдай ғана балдырғандар да өз қуаныштарын әдемі өлең шумақтарымен жеткізді. “Мектебім - мейірім мекені” тақырыбындағы мерекелік іс-шарада жоғары сынып оқушылары мен биыл ғана бірінші сыныпқа келген жас буын шәкірттер жаңа оқу жылының алғашқы қоңырауын соқты. Мектептеріне сағынышпен оралған оқушылар мен ұстаздар қуанышқа ортақтаса келген ата-аналармен бірге Білім күнін қарсы алды.
